За памерлага айца Юзафа памаліліся ў Нарачы

Св. Імшу ўзначаліў Рэгіянальны Вікарый кармэлітаў босых у Беларусі а. Пётр Фроштэга OCD. На пачатку літургіі ўсіх прысутных прывітаў настаяцель манаскай супольнасці ў Нарачы а. Павел Герман OCD. Гамілію прамовіў а. Казімір Мараўскі OCD з Гудагаю, які найбольш гадоў пражыў і працаваў з памерлым а. Юзафам. У гаміліі а. Казімір засяродзіў увагу на факце, што няма жыцця без смерці і няма смерці без жыцця; што нашае жыццё змяняецца, але не заканчваецца, а ўваскрослы Пан Езус, Пераможца граху і смерці, з'яўляецца непахісным пацверджаннем гэтай праўды. Таксама казнадзей узгадаў пра духоўныя і чалавечыя рысы спачылага а. Юзафа, які ніколі не стамляўся з вялікай пабожнасцю і адказнасцю ставіцца да цэлебрацыі Эўхарыстыі, іншых сакрамэнтаў і заўсёды быў верным малітве. Таксама ў братэрскім жыцці быў, як і кожны, хто мае свае недахопы, але заўсёды імкнуўся і не баяўся: прасіць, перапрашаць і дзякаваць. Вызначаўся незвычайным пачуццём гумару, гасціннасцю і клопатам аб патрэбах уісх, хто патрабаваў дапамогі. 

На заканчэнне св. Імшы айцец настаяцель Павел Герман OCD і Рэгіянальны Вікарый а. Пётр Фроштэга OCD падзякавалі ўсім прысутным за прыбыццё і супольную малітву за спачылага ў Пану а. Юзафа Сыноўца OCD.

А. Юрый Кулай OCD.